من راد وصل المعالي ياصاح لازم يجد
ومن جاد ويه الوكت دايم يعيش ويجد
أعمل بدنياك وحيث الذي جد يجد
واليزرع الطيب لابد أن يرى طيبه
الزم حدود الصبر عاقبة الصبر طيبه
أن عاشرت عطار صابك من اثر طيبه
وأن عاشرت فحام غير الدخن ماتجد
---------------------------------------------
ياصاح انته الخوي وانته بحياتي ورد
تمنيت اوصل الك وانطيك قلبي ورد
بالروح حبك زرع بستان هيل و ورد
وسهام حبك صفن بالقلب ميه وألف
بس انته ولفي صرت ماعندي غيرك ولف
لو ابقى طول العمر أفتر وأدور ولف
ماألكا مثلك خوي ولاألكا مثلك ورد
----------------------------------------------
افكد احبابي ودمعتي تسيل حداره
وتعوم نار الجفا بضلوع حداره
طحت بمصيببه ولا بصحاب حداره
واصبحنا ميتين بس الغير حي يرنه
والهضم دون الخلك محيار حيرنه
أمر الليالي وحك الله حيرنه
للغير تزهي وعلينه اتزوم حداره
---------------------------------------------
أخيول صبري براري الشوك ساجنها
ومايوم عنك ليالي الشوم ساجنها
رياض حبك دموع العين ساجنها
واحفظ عهودك ولاأخلف معاك وعود
مراقب الدروب وانطر يازمان تعود
أتعبني ضيم الهجر ضليت بس العود
أطلق سراح النفس كافيك ساجنها
--------------------------------------------دهر يتمايل وشفت الضيم رباني
مثل السفينه ابحر من غير رباني
فاكد عزيز القلب على الطيبات رباني
واليوم قابل دليلي وبالحزن داواه
عبره بدليلي اسكنت طول العمر داواه
انجان ساري تهيالو بشر داواه
اني بجفاكم ياخوي دواي رباني
-----------------------------------------------
انشد عليك شكثر وتكول ما انشد
ولوما غلاكم علي ماأطرب ولا انشد
ان مال بيك الوكت ياصاحبي وانشد
تلكاني عد يمناك بالموزمه لك ظهر
احنه طبعنه الوفه مو هسه بينه ظهر
العاملك بالشين انشوفو نجم الظهر
وانجان غثك بشر أعتبر اثمو انشد
--------------------------------------------------
ياداوي جفوف بالله دوك جف النا
سود الليالي عن الطيبيين جفنا
تسكي الموديين سم عربيد جيف النا
ويادار خلي بنار الهوى سنوني
ودست من اجلهم كطب عاكول وسنوني
ومادام تنطي لحم للماله سنوني
مالازم نعيش جيب الخام جفنا
---------------------------------------------------
خلي كسر بي على طول الدهر جناي
وظنون ماظنتي يااهل الورد جناي
لي عاد انا ياترف لمحاسنك جنأي
شفني خلافك لكني ما كل لي زهر
وازهرت قلبي بنيران الموده زهر
ترد وتكول ذاك الورد يازي زهر
ماني مصلح بذا العشرة ولا جناي
-----------------------------------------------
ياليل ذاك الترف هم الحزن.... صابو
بلله ياطير السما غرب لعد ....صوبو
خبرو ابموتي دنى واهلي الكبر صبو
واصرخت أمي بحزن يبني عجب مالك
منت الوحيد الترف وابدن بعد مالك
اوصاتي لهل الشعر من ضمنهم مالك
يكتب عليه غزل مات وعشك صابو
--------------------------------------------------
يازين ليش الوكت عكس الهوى دارك
وآني الكظيت العمر داري كرب دارك
كلبي بجفاك انشغل وتاه العكل دارك
من حيث مثل ألخبل دنياك خلتني
مجروح وسط الكلب وبسهام خلتني
عاندت نفسي وكلت للموت خل أتني
وظليت أبجي بحزن كلما شفت دارك
-------------------------------------------------
لو هوجر الليل لو نام الخمل والني
تكثر هواجيس قلبي ولوعتي ووني
مرات افكر بزماني وناسي وني
ماخوذ اخيذ الضحى ومرات اكول ايعاد
ومرات اصبر القلب اصبر ياقلبي وعاد
الله اكبر اذا جار الزمان وعاد
يهد العوالي كبل ما الوطى يوني
----------------------------------------------------
اسأل عليكم يغالي الروح ماكو انتو
وجروح قلبي بجفاكم حيل ماكنتو
دولاب هذا الزمن وأدور ماكنتو
وأحنا صفينا بوجل والغير ظل بسعاد
من عكبكم ياترف نكضي العمر بس عاد
كافي ليالي الهجر ياصاحبي بس عد
وين انتو وين الهجر يعزاز ماكنتو
-------------------------------------------------
يادار جنتي شبيه جنان معروضه
وايام عزج هنا وسرور معروضه
ثاري ليالي الفرح للبين معروضه
واليوم طاري السعد ياحيف مابيجه
ماأريد امر عليج واجبر الروح مابيجه
مادام ولفي الاريده يادار مو بيجه
للبيع اكتب على البيبان معروضه
----------------------------------------------------
خسر ميزان ولفك ياخوي جيلك
وحنه انتنازل عن حكوك الهوى جي لك
كلما اجلب عضو من أعضاي بي جيلك
ايضا وخليت في لب الحشا لك وشم
وماجنت وياك اسمع بالسعاده واشم
رغم اني صابر على ضيم الليالي وأشم
أفطن على صروف دهرك بيك وبجيلك
-------------------------------------------------------
يازين حكمك عليا بجور مشيتو
حفيان جدمي بشوك هواك مشيتو
الدمع من اجلك همل مايوم مشيتو
وكلبي بحبك فلا غير المصايب جاه
وبرغم هذا غرامك للممات ابجاه
يازين لولا أعرفكم ترجعولي بجاه
حتى المهيري عليكم جان مشيتو
----------------------------------------------------------
ظليت اداوي اجروح كلبي ولا منجلي
اعتب على خلتي انخه ولا منجلي
فريت برويحتي بلجن اجد منجة إلي
جناز كاصد غرب ادفن شبابي ورد
وركض ورة المنخه بلجن يطكن ورد
وبجي على مصيبتي وسجب مدامع ورد
والناس كله احصدت وانة انكسر منجلي
-------------------------------------------------
زماني بحر الشكه بعز البرد غطني
بردان ارتجف ولا من صحت غطني
ضماد ماينفع بجرحي ولا قطني
كل يوم ابني على ساف القهر لبنه
لبنه بهواكم بليل الدجه لبنه
وترف اكشورنه وحرر على لبنه
جور الليالي مثل قط القلم قطني
---------------------------------------------------
سمر الليالي رماد الدار خلني
والعقل مني شرد ياصاح خلني
بحراب ولعه الطعن بحشاي خلني
ليلي تطاول وعن قرب الصباح ابعد
ومن ضعف حالي نسوني من الحساب وعد
اضحيت مثل الطعين الضاربينه بعود
نجايب الخيل بارض قفار خلني
------------------------------------------------
انكرت طيبي مع الايام شيهمك
ارحل تراني بهضم ونوح من همك
ماجان تترك حناني سنين لو همك
حبك سلبلي العقل يازين ماتدري
وجروح تنزف بنص حشاي لو تدري
اني الهويتك وكل الناس هم تدري
زيد جروحي بسيف الغدر ماهمك
--------------------------------------------------
موضوع: ابيات من الزهيري اكثر من الروعة 
الإثنين مارس 21, 2011 3:01 pm
